បើសិនជ្រុលប្រឡាក់កាវកំពូលស្អិត ៥០២ ជាប់ដៃ ជើង បបូរមាត់ ​ភ្នែក តើត្រូវធ្វើយ៉ាងណាទៅ?

បើសិនជ្រុលប្រឡាក់កាវកំពូលស្អិត ៥០២

នរណាក៏ដឹងដែរថា កាវ ៥០២ ជាកាវកំពូលស្អិតដែលអាចបិទវត្ថុជាច្រើនឱ្យជាប់មិនរបេះ។ ចុះប្រសិនបើ​ចៃដន្យ កាវ ៥០២ នោះប្រឡាក់​ជាប់​ផ្នែក​ណាមួយ​នៃ​រាងកាយ​របស់យើងដូចជាដៃ ជើង ​ត្របកភ្នែក និង​បបូរមាត់ជាដើម តើត្រូវធ្វើយ៉ាងណាទៅ?

បើសិនជ្រុលប្រឡាក់កាវកំពូលស្អិត ៥០២

ខាងក្រោមនេះជា​វិធី​ដែលយើងអាចអនុវត្តដើម្បីជៀសវាងហានិភ័យផ្សេងៗ​៖

1. ករណី​ប្រឡាក់​ដៃ ជើង និងខ្លួនប្រាណ៖

ករណី​ប្រឡាក់​ដៃ ជើង និងខ្លួនប្រាណ

​វីធីទី ១៖ ​ត្រូវ​ត្រាំ​ដៃកន្លែងដែលប្រឡាក់នោះក្នុង​ទឹក​ក្តៅ​ឧណ្ហៗ​ជាមួយ​សាប៊ូ ឬ ត្រាំ​ដៃ​ក្នុង​ទឹកខ្មេះ។ បានបន្តិចកាវ​នឹង​រលាយហើយរបូត​ចេញពី​ដៃ បន្ទាប់មក​យើងត្រដុស​កាវ​ចេញពី​ដៃ​ថ្នមៗ​ជាការ​ស្រេច​។​

ត្រូវ​ត្រាំ​ដៃកន្លែងដែលប្រឡាក់នោះក្នុង​ទឹក​ក្តៅ​ឧណ្ហៗ​ជាមួយ​សាប៊ូ

វីធីទី ២៖ អាចលាបប្រេង​ខ្យល់​ពីលើ​កន្លែង​ដៃដែល​ប្រឡាក់​កាវ ក៏​អាចជម្រុះកាវឱ្យរបូតចេញដូចគ្នា​។

វីធីទី ​៣៖ ​ទឹក​ថ្នាំប៉ូលា​ ឬថ្នាំលាបក្រចកដៃក៏មានប្រសិទ្ធភាពមិនចាញ់ប្រេងខ្យល់ដែរ។ អាចយកវាមក​លាប​លើ​ដៃ​ជាប់​កាវ ហើយក៏អាចឱ្យ​របូត​កាវ​ចេញ​ដែរ​។

វីធីទី ​៤៖ បើពុំមានប្រេងខ្យល់ឬថ្នាំលាបក្រចក អាចយក​អាល់កុលឬសាំងមក​លាប​លើ​ដៃ​ប្រឡាក់​កាវ ដើម្បីជម្រះកាវនោះបានដូចគ្នា។

អាចលាបប្រេង​ខ្យល់​ពីលើ​កន្លែង​ដៃដែល​ប្រឡាក់​កាវ

​វីធីទី ៥៖ លាយអំបិល ២ ស្លាបព្រាបាយនឹង​ទឹក​បន្តិច រួច​ត្រដុស​ត្រង់​កន្លែង​ប្រឡាក់​កាវ ទុក ៣០វិនាទី ទៅ ១នាទី នោះកាវនឹងរបកដោយឯងឯង។

​2. ករណីប្រឡាក់ត្រង់បបូរមាត់៖

បើប្រឡាក់កាវ ៥០២​ ត្រង់បបូរមាត់ កុំព្យាយាមហារមាត់ឱ្យសោះព្រោះវានឹងធ្វើឱ្យរបួសហូរឈាម ដោយសារកាវវាស្អិតខ្លាំងពេក។ 

គួរត្រាំ​បបូរមាត់​ក្នុង​ទឹក​ក្តៅ​ឧណ្ហៗ ឬយកទឹកក្ដៅមកទះថើៗលើមាត់ មួយសន្ទុះ​ក្រោយមកចាប់ផ្ដើម​ហាមាត់​តិចៗ រហូតអាចជម្រះកាវនោះបាន។

ករណីប្រឡាក់ត្រង់បបូរមាត់

3. ករណី​ប្រឡាក់​កាវ​ត្រង់​ត្របកភ្នែក៖

ដូចគ្នានឹងបបូរមាត់ដែរ ចៀសវាងបើកភ្នែកភ្លាមៗព្រោះអាចធ្វើឱ្យរបួសភ្នែក។ គួរយក​ក្រណាត់​ជ្រលក់​ទឹក​ក្តៅ​ឧណ្ណៗ​ស្អំ​លើ​ត្របកភ្នែកត្រង់កន្លែងប្រឡាក់កាវ ហើយ​ជូត​ថ្នមៗ​។ ចាំរហូតដល់មានអារម្មណ៍ថាកាវវចាប់ផ្ដើមរបេះសឹមបើកភ្នែកតិចៗដើម្បីជម្រុះកាវចេញ រួចលាងទឹកឱ្យស្អាត។

ករណី​ប្រឡាក់​កាវ​ត្រង់​ត្របកភ្នែក

តែប្រសិនបើ​កាវ​ចូល​ភ្នែក ត្រូវតែប្រញាប់ប្រញាលឱ្យគេនាំទៅជួបគ្រូពេទ្យជំនាញជាបន្ទាន់៕