ធនាគារ CIMB ប្រកាស​ឲ្យ​អាហារូបករណ៍ ១០០% រៀន​គ្រប់​សាលា​ល្បីៗ​លើ​ពិភព​លោក

ដើម្បី​អភិវឌ្ឍ​សមត្ថភាព​យុវជន​ក្នុង​តំបន់​អាស៊ាន CIMB Group កំពុង​ផ្ដល់​អាហារូបករណ៍ ១០០% សម្រាប់​ការ​សិក្សា​ថ្នាក់​បរិញ្ញាបត្រ នៅ​គ្រប់​សាកល​វិទ្យាល័យ​ល្បី​ឈ្មោះនៅ​ជុំវិញ​ពិភព​លោក។ ការផ្តល់អាហារូបករណ៍​ដ៏​ធំ​នេះ គឺចាប់​ពី​ថ្ងៃ​នេះ ដល់​ថ្ងៃ​ទី​៥ មីនា ២០១៨ ដែល​បើក​ទទួល​ពាក្យ​ស្នើ​សុំ​សម្រាប់​សិស្ស​ទាំង​អស់​ទើប​បញ្ចប់​ថ្នា​ក់​ទី១២ ឬ​កំពុង​សិក្សា​ថ្នាក់​បរិញ្ញាបត្រ និង​មាន​អាយុ​ក្រោម ២៤ឆ្នាំ ហើយ​ស្ថិត​នៅ​ក្នុង​កម្ពុជា ម៉ាឡេស៊ី ឥណ្ឌូណេស៊ី សិង្ហបុរី ថៃ វៀតណាម និង ហ្វីលីពីន។

អាហារូបករណ៍​នេះ នឹង​ផ្ដល់​ជំនួយ​ឧបត្ថម្ភ ១០០% រួម​មាន​ ថ្លៃ​សិក្សា សំបុត្រ​យន្ត​ហោះ កន្លែង​ស្នាក់​នៅ ដំណើរ​កម្សាន្ត​មក​ស្រុក​កំណើត សេវា​ធានា​រ៉ាប់​រង ព្រម​ទាំង​ថ្លៃ​ចំណាយ​ផ្សេងៗ ហើយ​ថែម​ទាំង​មាន​ឱកាស​ធ្វើ​ជា​បុគ្គលិក​ហាត់​ការ និង​ពេញ​សិទ្ធិ ក្នុង​ចំណោម​សាខា​របស់ CIMB Group ទូទាំង​តំបន់ ទាំង​អំឡុង​ពេល និង​ក្រោយ​ពេល​បញ្ចប់​ការ​សិក្សា។

លោកស្រី អ៊ុំ ចិន្តាភក្តី នាយិកា​ធន​ធាន​មនុស្ស CIMB ​និយាយ​ថា៖ "អាហារូបករណ៍​របស់ CIMB នេះ ជា​ឱកាស​មាស សម្រាប់​សិស្ស​និស្សិត​ខ្មែរ ដើម្បី​ចាប់​យក​ឱកាស​សិក្សា​នៅ​សាកល​វិទ្យាល័យ​ល្បីៗ និង​ឱកាស​ការងារ​នៅ CIMB"។

ធនាគារ CIMB ប្រកាស​ឲ្យ​អាហារូបករណ៍ ១០០% រៀន​គ្រប់​សាលា​ល្បីៗ​លើ​ពិភព​លោក

និស្សិត​អាហារូបករណ៍ ក៏​ទទួល​បាន​ការ​យកចិត្ត​ទុក​ដាក់ ព្រម​ទាំង​តម្រង់​ទិស​ពី​ធនាគារ CIMB សម្រាប់​ការ​សិក្សា ការ​បណ្ដុះ​បណ្ដាល ដែល​ជា​ឱកាស​ភ្ជាប់​ទំនាក់​ទំនង​ជាមួយ​បុគ្គលិក និង​គណៈ​គ្រប់​គ្រង​ជាន់​ខ្ពស់ រួម​ទាំង​ការ​ចូលរួម​កម្មវិធី​តំបន់​អាស៊ាន​នានា​របស់ CIMB ទៀត​ផង។

យុវតី ងួន ពញ្ញានាត និស្សិត​ខ្មែរ​មួយ​រូប​ក្នុង​ចំណោម​បណ្ដា​ប្រទេស​ផ្សេងៗ ដែលបានអាហារូបករណ៍​សិក្សា​នៅ​សាកល​វិទ្យាល័យ McGill ប្រទេស​កាណាដា បាន​ឲ្យ​ដឹង​ថា៖ "ខ្ញុំ​ពិតជា​ពេញ​ចិត្ត​ការ​សិក្សា​របស់​ខ្ញុំ នៅ​ទី​នេះ ដោយ​មាន​គុណភាព​អប់រំ​ស្តង់ដារ​ពិភព​លោក រួម​ទាំង​បរិយាកាស​ថ្មីៗ ដែល​ខ្ញុំ​បាន​រៀន​សូត្រ​ពី​នេះ។ ខ្ញុំ​សូម​អរគុណ​ដល់ CIMB ដែល​ផ្ដល់​អាហារូបករណ៍​ដ៏​មាន​តម្លៃ​នេះ"។

អាហារូបករណ៍​តំបន់​អាស៊ាន​របស់ CIMB ផ្ដល់​ជូន​មុខ​វិជ្ជា​សិក្សា​ជាច្រើន​រួម​មាន៖

• ពាណិជ្ជកម្ម
• ការ​គ្រប់​គ្រង
• គណនេយ្យ
• ធនាគារ និង​ហិរញ្ញវត្ថុ
• សេដ្ឋកិច្ច
• ការ​ច្នៃ​ប្រឌិត និង​ភាព​ជា​សហគ្រិន
• ការ​គ្រប់​គ្រង​ហានិភ័យ
• វិទ្យាសាស្ត្រ​នយោបាយ
• ទំនាក់ទំនង​អន្តរជាតិ
• វិទ្យាសាស្ត្រ​កុំព្យូទ័រ
• ព័ត៌មានវិទ្យា
• ប្រព័ន្ធ​ផ្សព្វផ្សាយ​ឌីជីថល
• គណិតវិទ្យា
• វិទ្យាសាស្ត្រ​ពិត
• ការស្រាវជ្រាវ​ប្រតិបត្តិការ
• ទំនាក់ទំនង
• ច្បាប់
• វិស្វកម្ម និង​មុខវិជ្ជា​ដទៃ​ទៀត

សម្រាប់​លក្ខខណ្ឌ​ដាក់​ពាក្យ​ស្នើ​សុំ និង​ព័ត៌មាន​បន្ថែម សូម​ចូល​ទៅ​វិបសាយ www.cimb.com/aseanscholarship ៕

ធនាគារ CIMB ប្រកាស​ឲ្យ​អាហារូបករណ៍ ១០០% រៀន​គ្រប់​សាលា​ល្បីៗ​លើ​ពិភព​លោក